بنا کے اپنے سفینے کا ناخدا مجھ کو

بنا کے اپنے سفینے کا ناخدا مجھ کو

کسی نے کر دیا طوفاں سے آشنا مجھ کو

میں ایک سنگ سر افگندہ تو ہے سنگ تراش

ستون کعبہ بنا یا صنم بنا مجھ کو

میں خود غرض ہوں کسی کا نہیں ہوں اپنے سوا

زمانہ ہے کہ سمجھتا ہے آشنا مجھ کو

تمہارا شہر گلستاں سہی مگر اس میں

ملے ہیں خون کے دھبے بھی جا بجا مجھ کو

میں زندگی سے بہت کچھ مطالبہ کرتا

تری نگاہ نے خاموش کر دیا مجھ کو

نگاہ شوق ہی بہتر ہے التجا کے لیے

زباں کھلے گی تو سمجھیں گے وہ گدا مجھ کو

وہ بد نصیب مسافر ہوں راہ ہستی کا

نہ راہزن ہی میسر نہ رہ نما مجھ کو

گلا نہیں مجھے احساںؔ تہی سہی دامن

یہ کم نہیں کہ ملا دست بے دعا مجھ کو

bana ke apne safine ka nakhuda mujh ko

kisi ne kar diya tufan se ashna mujh ko

main ek sang-e-sar afganda to hai sang tarash

sutun kaaba bana ya sanam bana mujh ko

main khud gharaz hun kisi ka nahin hun apne siwa

zamana hai ke samajhta hai ashna mujh ko

tumhara shahr gulistan sahi magar is mein

mile hain khun ke dhabbe bhi ja baja mujh ko

main zindagi se bahut kuchh mutaliba karta

tiri nigah ne khamosh kar diya mujh ko

nigah-e-shauq hi behtar hai iltija ke liye

zaban khulegi to samjhenge wo gada mujh ko

wo bad nasib musafir hun rah hasti ka

na rahzan hi muyassar na rah numa mujh ko

gila nahin mujhe ehsan tahi sahi daman

ye kam nahin ke mila dast-e-be dua mujh ko