Arooz is now on the App Store, for iPhone and iPad. Download →

All poetry

ہوئے جس عشق کے محصور جانے ہی نہیں دیتا

Ehtisham Hasan (b. 1969)

ہوئے جس عشق کے محصور جانے ہی نہیں دیتا

ہمیں خود سے زیادہ دور جانے ہی نہیں دیتا

مزاجاً ابتدا سے ہم اسیر دشت ہجراں ہیں

جہاں سے اب دل مجبور جانے ہی نہیں دیتا

یہ لطف عشق ایسا ہے لپٹ جاتا ہے پیروں سے

کوئی سرمد ہو یا منصور جانے ہی نہیں دیتا

جہاں بے چین پھرتے ہیں اجالے مانگنے والے

اندھیرا اس جگہ تک نور جانے ہی نہیں دیتا

ہمیں درکار ہے رخصت غم دوراں سے کچھ دن کی

وہ عرضی کر کے نامنظور جانے ہی نہیں دیتا

عجب سرمہ بنایا ہے تری ضرب تجلی نے

مری آنکھوں سے کوہ طور جانے ہی نہیں دیتا

فضاؤں میں وفا اور خاک میں اتنی محبت ہے

کہاں جاؤں بہاولپور جانے ہی نہیں دیتا