کہیں چراغ بجھانا پڑا کہ میں بھی ہوں

کہیں چراغ بجھانا پڑا کہ میں بھی ہوں

کہیں پہ خود کو جلانا پڑا کہ میں بھی ہوں

میرے گلے میں جو ڈالا میرے حریفوں نے

مجھے وہ ڈھول بجانا پڑا کہ میں بھی ہوں

تری عطا وہ تجسس ہے جس کے بڑھنے پر

تجھے بھی طور پہ آنا پڑا کہ میں بھی ہوں

وہ بار بار مجھے بھولتا تھا اور مجھے

یہ بار بار بتانا پڑا کہ میں بھی ہوں

سنا تھا آئیں گے محفل میں دل دریدہ لوگ

مجھے بھی زخم دکھانا پڑا کہ میں بھی ہوں

وہاں پہ خود کو دکھایا جہاں میں تھا ہی نہیں

کہیں یہ سچ بھی چھپانا پڑا کہ میں بھی ہوں

میں مانتا ہوں کہ خاموش ہے مگر وہ ہے

مجھے تو شور مچانا پڑا کہ میں بھی ہوں

ہوا نہیں تو بھی ثابت کروں گا ہونے کو

اگر یقین دلانا پڑا کہ میں بھی ہوں

حسنؔ ہے اتنا ضروری وجود کا اظہار

ہوا کو پیڑ ہلانا پڑا کہ میں بھی ہوں

kahin charagh bujhana para ke main bhi hun

kahin pe khud ko jalana para ke main bhi hun

mere gale mein jo dala mere harifon ne

mujhe wo dhol bajana para ke main bhi hun

tiri ata wo tajassus hai jis ke barhne par

tujhe bhi tur pe ana para ke main bhi hun

wo bar bar mujhe bhulta tha aur mujhe

ye bar bar batana para ke main bhi hun

suna tha aenge mahfil mein dil darida log

mujhe bhi zakhm dikhana para ke main bhi hun

wahan pe khud ko dikhaya jahan mein tha hi nahin

kahin ye sach bhi chhupana para ke main bhi hun

main manta hun ke khamosh hai magar wo hai

mujhe to shor machana para ke main bhi hun

hawa nahin tu bhi sabit karunga hone ko

agar yaqin dilana para ke main bhi hun

husn hai itna zaruri wajud ka izhar

hawa ko per hilana para ke main bhi hun