رات میں شانۂ ادراک سے لگ کر سویا

رات میں شانۂ ادراک سے لگ کر سویا

بند کی آنکھ تو افلاک سے لگ کر سویا

اونگھتا تھا کہیں محراب کی سرشاری میں

اک دیا سا کسی چقماق سے لگ کر سویا

ایک جلتا ہوا آنسو جو نہیں سوتا تھا

دیر تک دیدۂ نمناک سے لگ کر سویا

ان گنت آنکھیں مرے جسم پہ چندھیائی رہیں

بقعۂ نور مری خاک سے لگ کر سویا

کوزہ گر نے مرے بارے میں یہ دفتر میں لکھا

چاک سے اترا مگر چاک سے لگ کر سویا

نیند کی شرط تھی تنہا نہیں سونا مجھ کو

ہجر تھا سو اسی سفاک سے لگ کر سویا

رات کانٹوں پہ گزاری تو سویرے سوچا

کس لیے خیمۂ عشاق سے لگ کر سویا

نیند سولی پہ چلی آئی سو زخم عریاں

اپنی اک خواہش پوشاک سے لگ کر سویا

rat mein shana-e-idrak se lag kar soya

band ki ankh to aflak se lag kar soya

unghta tha kahin mehrab ki sarshari mein

ik diya sa kisi chaqmaq se lag kar soya

ek jalta hua ansu jo nahin sota tha

der tak dida-e-namnak se lag kar soya

an ginat ankhen mire jism pe chundhyai rahen

buqa-e-nur miri khak se lag kar soya

kuza gar ne mire bare mein ye daftar mein likha

chak se utra magar chak se lag kar soya

nind ki shart thi tanha nahin sona mujh ko

hijr tha so isi saffak se lag kar soya

rat kanton pe guzari to sawere socha

kis liye khema-e-ushshaq se lag kar soya

nind suli pe chali ai so zakhm-e-uryan

apni ik khwahish-e-poshak se lag kar soya