یوں سمایا ہے کہ اب سر سے نکلنے کا نہیں

یوں سمایا ہے کہ اب سر سے نکلنے کا نہیں

میں جو چاہوں بھی تو اک ڈر سے نکلنے کا نہیں

میں نے جو خوف پرویا تھا رگوں میں اپنی

ایسا بیٹھا ہے کہ اندر سے نکلنے کا نہیں

بعد کوشش کے نتیجہ یہ نکالا میں نے

زندگی میں ترے چکر سے نکلنے کا نہیں

کھینچ لاتے ہیں حقیقت میں حوادث ورنہ

آدمی خواب کے محور سے نکلنے کا نہیں

سر پٹختا نہیں پنجرے میں پرندہ یوں ہی

شوق پرواز کبھی پر سے نکلنے کا نہیں

اک سڑک اور مرا آٹھواں دسواں چکر

اور مجھے علم ہے وہ گھر سے نکلنے کا نہیں

اپنے اندر یوں چھپائے ہیں صنم پتھر نے

بت کوئی تیشۂ آذر سے نکلنے کا نہیں

غم دوراں بھی ہے یوں جیسے مرا یوم حساب

میں تو دنیا میں بھی محشر سے نکلنے کا نہیں

دھونس دیتا ہے یہ سورج مجھے ہر شام حسنؔ

وہ جو ڈوبا تو سمندر سے نکلنے کا نہیں

yun samaya hai ke ab sar se nikalne ka nahin

main jo chahun bhi to ik dar se nikalne ka nahin

main ne jo khauf piroya tha ragon main apni

aisa baitha hai ke andar se nikalne ka nahin

baad koshish ke natija ye nikala main ne

zindagi mein tire chakkar se nikalne ka nahin

khinch late hain haqiqat mein hawadis warna

admi khwab ke mehwar se nikalne ka nahin

sar patakhta nahin pinjre mein parinda yun hi

shauq-e-parwaz kabhi par se nikalne ka nahin

ik sarak aur mira athwan daswan chakkar

aur mujhe ilm hai wo ghar se nikalne ka nahin

apne andar yun chhupae hain sanam patthar ne

but koi tesha-e-azar se nikalne ka nahin

gham-e-dauran bhi hai yun jaise mira yaum-e-hisab

main to duniya mein bhi mahshar se nikalne ka nahin

dhauns deta hai ye suraj mujhe har sham husn

wo jo duba to samundar se nikalne ka nahin