پھر اٹھی چشم فسوں ساز خدا خیر کرے

پھر اٹھی چشم فسوں ساز خدا خیر کرے

دل ہے پھر غرق مئے ناز خدا خیر کرے

برق چمکی ہے بصد ناز خدا خیر کرے

پھر نشیمن کا ہے آغاز خدا خیر کرے

دل کے بس میں تھا چھپایا بہت اس نے لیکن

دست مژگاں میں ہے اب راز خدا خیر کرے

کوئی آتا ہے پس قافلۂ فصل بہار

پھر ہے زنجیر کی آواز خدا خیر کرے

برق کی زد میں گلستاں تو نہیں ہے لیکن

گل سے ہے آگ کی پرواز خدا خیر کرے

دل کی دھڑکن تھے جو کل آج وہی دیوانے

ہو گئے دور کی آواز خدا خیر کرے

جانتے ہیں کہ بدلتی نہیں تقدیر نصیبؔ

وقت اور محرم و ہم راز خدا خیر کرے

phir uthi chashm-e-fusun saz khuda khair kare

dil hai phir gharq-e-mai-e-naz khuda khair kare

barq chamki hai basad naz khuda khair kare

phir nasheman ka hai aghaz-e-khuda khair kare

dil ke bas mein tha chhupaya bahut us ne lekin

dast-e-mizhgan mein hai ab raz khuda khair kare

koi ata hai pas qafila-e-fasl-e-bahar

phir hai zanjir ki awaz khuda khair kare

barq ki zad mein gulistan to nahin hai lekin

gul se hai ag ki parwaz khuda khair kare

dil ki dharkan the jo kal aj wahi diwane

ho gae dur ki awaz khuda khair kare

jante hain ke badalti nahin taqdir nasib

waqt aur mahram-o-ham raz khuda khair kare