سکون پیار تبسم بہار گل شبنم

سکون پیار تبسم بہار گل شبنم

خوشی میں زیست کو کیا کیا سمجھ گئے تھے ہم

غموں سے قلب و نظر کا بدل گیا عالم

مگر مزاج تبسم نہ ہو سکا برہم

یہ کس کو ڈھونڈتے پھرتے ہیں میرے دیدۂ نم

کہاں وہ لوگ جو اب بانٹ لیں حیات کے غم

کس آفتاب صفت شخص کے رکے تھے قدم

چراغ دیر و حرم کے ہیں آج تک مدھم

جنوں کی راہ سے گزرا نہیں کوئی شاید

کسی جگہ تو دکھائی دے کوئی نقش قدم

خرد پہنچ کے وہاں آج ناز کرتی ہے

وہ جس مقام پہ کل تک گزار آئے ہم

رہ وفا سے گزرنا محال ہو جاتا

اگر نصیبؔ نہ ہوتا ہمارے ساتھ یہ غم

sukun pyar tabassum bahar-e-gul shabnam

khushi mein zist ko kya kya samajh gae the ham

ghamon se qalb-o-nazar ka badal gaya alam

magar mizaj tabassum na ho saka barham

ye kis ko dhundte phirte hain mere dida-e-nam

kahan wo log jo ab bant len hayat ke gham

kis aftab sifat shakhs ke ruke the qadam

charagh-e-dair-o-haram ke hain aj tak maddham

junun ki rah se guzra nahin koi shayad

kisi jagah to dikhai de koi naqsh-e-qadam

khirad pahunch ke wahan aj naz karti hai

wo jis maqam pe kal tak guzar ae ham

rah-e-wafa se guzarna muhal ho jata

agar nasib na hota hamare sath ye gham