کوئی الزام نہ دنیا میں کسی پر رکھنا

کوئی الزام نہ دنیا میں کسی پر رکھنا

دل لہو ہو بھی تو چہرے کو گل تر رکھنا

خاک کا ہو کہ ہو کانٹوں کا وہ بستر اے دوست

نیند آ جائے گی تکیہ تو خدا پر رکھنا

کیا خبر راہ میں کب ساتھ خوشی کا چھوٹے

زندگی غم کو بھی ساتھ اپنے برابر رکھنا

دیکھ آنکھوں کی زمیں ہے نہ لرز جائے کہیں

اے تصور تو یہاں پاؤں سنبھل کر رکھنا

زانوئے یار سمجھ کر اسے سو جائیں گے

ہم غریبوں کے سرہانے ذرا پتھر رکھنا

چاہتا ہے یہ مرے دور کا دستور نصیبؔ

تشنگی دل میں تو آنکھوں میں سمندر رکھنا

koi ilzam na duniya mein kisi par rakhna

dil lahu ho bhi to chehre ko gul-e-tar rakhna

khak ka ho ke ho kanton ka wo bistar ai dost

nind a jaegi takiya to khuda par rakhna

kya khabar rah mein kab sath khushi ka chhote

zindagi gham ko bhi sath apne barabar rakhna

dekh ankhon ki zamin hai na laraz jae kahin

ai tasawwur to yahan paon sambhal kar rakhna

zanu-e-yar samajh kar use so jaenge

ham gharibon ke sirhane zara patthar rakhna

chahta hai ye mire dur ka dastur nasib

tishnagi dil mein to ankhon mein samundar rakhna