گزر نہیں ہے کسی کا تو راستہ کیوں ہے

گزر نہیں ہے کسی کا تو راستہ کیوں ہے

جو راستہ ہے تو محروم نقش پا کیوں ہے

ہر ایک شخص سمجھتا ہے اجنبی پھر بھی

تمہارے گھر کا پتہ مجھ سے پوچھتا کیوں ہے

تمہارا شہر اجالوں کا شہر سنتے تھے

قدم قدم پہ اندھیروں کا سامنا کیوں ہے

وہی سحر ہے وہی شب وہی ہے ہنگامہ

مگر حیات کا منظر اداس سا کیوں ہے

میں اپنے وقت کی تصویر بن گیا تو نہیں

ہر آدمی مجھے اس طرح دیکھتا کیوں ہے

نگاہ جب تری بینائی کھو چکی اپنی

تو زندگی ترے ہاتھوں میں آئنہ کیوں ہے

کسی سے مل کے بچھڑ جانا عمر بھر کو نصیبؔ

ذرا سی بھول کی اتنی بڑی سزا کیوں ہے

guzar nahin hai kisi ka to rasta kyun hai

jo rasta hai to mahrum naqsh-e-pa kyun hai

har ek shakhs samajhta hai ajnabi phir bhi

tumhare ghar ka pata mujh se puchhta kyun hai

tumhara shahr ujalon ka shahr sunte the

qadam qadam pe andheron ka samna kyun hai

wahi sahar hai wahi shab wahi hai hangama

magar hayat ka manzar udas sa kyun hai

main apne waqt ki taswir ban gaya to nahin

har admi mujhe is tarah dekhta kyun hai

nigah jab tiri binai kho chuki apni

to zindagi tire hathon mein aina kyun hai

kisi se mil ke bichhar jana umr bhar ko nasib

zara si bhul ki itni bari saza kyun hai