جاں گنواؤں کہ سر بچا لوں میں

جاں گنواؤں کہ سر بچا لوں میں

کوئی تلوار تو اٹھا لوں میں

تم نے فرقت کی شب گزاری ہے

کیوں نہ وحشت کا دن منا لوں میں

ہو اجازت تو بزم گریہ میں

غم ہنسوں درد گنگنا لوں میں

ایک صورت مجھے بنانی ہے

ایک صورت اگر مٹا لوں میں

بھوک لے آئے گی پرندوں کو

پھینک دوں جال یا اٹھا لوں میں

ایک آواز ہی لگانی ہے

ایک آواز پھر لگا لوں میں

رات بیزار ہے تو کیوں نہ زمانؔ

دل جلا لوں دیا بجھا لوں میں

jan ganwaun ke sar bacha lun main

koi talwar to utha lun main

tum ne furqat ki shab guzari hai

kyun na wahshat ka din mana lun main

ho ijazat to bazm-e-girya mein

gham hansun dard gunguna lun main

ek surat mujhe banani hai

ek surat agar mita lun main

bhuk le aegi parindon ko

phenk dun jal ya utha lun main

ek awaz hi lagani hai

ek awaz phir laga lun main

rat bezar hai to kyun na zaman

dil jala lun diya bujha lun main