تو فقط کہانی سن ہچکیوں کو بھول جا

تو فقط کہانی سن ہچکیوں کو بھول جا

اشک بار لوگ گن تالیوں کو بھول جا

موسموں نے کیا کیا یہ کہانی چھوڑ دے

بارشوں کو بھول جا پانیوں کو بھول جا

اب زباں میں آ گئیں لکنتیں رکاوٹیں

میری گفتگو کی تو نرمیوں کو بھول جا

زندگی ہے مختصر ہر عناد چھوڑ دے

خوبیوں کو یاد رکھ خامیوں کو بھول جا

یہ چمن ترا چمن پھول تیرے پھول ہیں

خود ہی دیکھ بھال کر مالیوں کو بھول جا

بھول جا وہ دن کی نیند رات کا وہ جاگنا

جگنوؤں کو بھول جا تتلیوں کو بھول جا

وہ ہمارے بچپنے کی کہانی تھی فقط

شاہ زادے بھول جا رانیوں کو بھول جا

جس میں جتنا ظرف تھا اس نے وہ دکھا دیا

میری بات مان جا تلخیوں کو بھول جا

دانشؔ شکستہ پا اب تو واعظوں کی سن

محفلوں کو بھول جا ساقیوں کو بھول جا

tu faqat kahani sun hichkiyon ko bhul ja

ashk bar log gin taliyon ko bhul ja

mausamon ne kya kya ye kahani chhor de

barishon ko bhul ja paniyon ko bhul ja

ab zaban mein a gain luknaten rukawaten

meri guftugu ki to narmiyon ko bhul ja

zindagi hai mukhtasar har inad chhor de

khubiyon ko yad rakh khamiyon ko bhul ja

ye chaman tira chaman phul tere phul hain

khud hi dekh bhal kar maliyon ko bhul ja

bhul ja wo din ki nind rat ka wo jagna

jugnuon ko bhul ja titliyon ko bhul ja

wo hamare bachpane ki kahani thi faqat

shah zade bhul ja raniyon ko bhul ja

jis mein jitna zarf tha us ne wo dikha diya

meri bat man ja talkhiyon ko bhul ja

danish-e-shikasta pa ab to waizon ki sun

mahfilon ko bhul ja saqiyon ko bhul ja