اگرچہ وقت مناجات کرنے والا تھا

اگرچہ وقت مناجات کرنے والا تھا

مرا مزاج سوالات کرنے والا تھا

مجھے سلیقہ نہ تھا روشنی سے ملنے کا

میں ہجر میں گزر اوقات کرنے والا تھا

میں سامنے سے اٹھا اور لو لرزنے لگی

چراغ جیسے کوئی بات کرنے والا تھا

کھلی ہوئی تھیں بدن پر رواں رواں آنکھیں

نہ جانے کون ملاقات کرنے والا تھا

وہ میرے کعبۂ دل میں ذرا سی دیر رکا

یہ حج ادا وہ مرے ساتھ کرنے والا تھا

کہاں یہ خاک کے تودے تلے دبا ہوا جسم

کہاں میں سیر سماوات کرنے والا تھا

agarche waqt-e-munajat karne wala tha

mira mizaj sawalat karne wala tha

mujhe saliqa na tha raushni se milne ka

main hijr mein guzar auqat karne wala tha

main samne se utha aur lo larazne lagi

charagh jaise koi bat karne wala tha

khuli hui thin badan par rawan rawan ankhen

na jane kaun mulaqat karne wala tha

wo mere kaaba-e-dil mein zara si der ruka

ye haj ada wo mire sath karne wala tha

kahan ye khak ke taude tale daba hua jism

kahan main sair samawat karne wala tha