نہ حرم کی مجھ کو ہے جستجو نہ تو رہ گزر کی تلاش ہے

جہاں سر جھکا کے ملے سکوں اسی سنگ در کی تلاش ہے

مجھے بھیجنا ہے پیام دل مگر ایک شرط بھی ہے مری

جو یہ راز راز ہی رکھ سکے اسی نامہ بر کی تلاش ہے

جو تو بن سکے مرا آسرا تو یہ ہوگا مجھ پہ کرم ترا

مجھے شاہ راہ حیات میں کسی ہم سفر کی تلاش ہے

ملے ایسا بادۂ سر خوشی جو نہ ختم ہو کبھی بے خودی

جو سنوار دے میری زندگی اسی اک نظر کی تلاش ہے

یہی زندگی کی ادا بھی ہے مری کائنات وفا بھی ہے

ترے غم پہ ناز ہے اس لئے کہ یہ عمر بھر کی تلاش ہے

نہ دوا دعا سے غرض مجھے نہ تو جام و مے کی طلب مجھے

جو علاج درد جگر کرے اسی چارہ گر کی تلاش ہے

کوئی کہہ دے اخترؔ ناتواں کہ قفس میں ہے مرا آشیاں

جو چمک رہی ہیں یہ بجلیاں انہیں میرے گھر کی تلاش ہے