ایک مجذوب اداسی میرے اندر گم ہے

ایک مجذوب اداسی میرے اندر گم ہے

اس سمندر میں کوئی اور سمندر گم ہے

بے بسی کیسا پرندہ ہے تمہیں کیا معلوم

اسے معلوم ہے جو میرے برابر گم ہے

چرخ سو رنگ کو فرصت ہو تو ڈھونڈے اس کو

نیلگوں سوچ میں جو مست قلندر گم ہے

دھوپ چھاؤں کا کوئی کھیل ہے بینائی بھی

آنکھ کو ڈھونڈ کے لایا ہوں تو منظر گم ہے

سنگ ریزوں میں مہکتا ہے کوئی سرخ گلاب

وہ جو ماتھے پہ لگا تھا وہی پتھر گم ہے

ایک مدفون دفینہ انہیں اطراف میں تھا

خاک اڑتی ہے یہاں اور وہ گوہر گم ہے

ek majzub udasi mere andar gum hai

is samundar mein koi aur samundar gum hai

be basi kaisa parinda hai tumhen kya maalum

use maalum hai jo mere barabar gum hai

charkh sau rang ko fursat ho to dhunde us ko

nilgun soch mein jo mast qalandar gum hai

dhup chhaon ka koi khel hai binai bhi

ankh ko dhund ke laya hun to manzar gum hai

sang rezon mein mahakta hai koi surkh gulab

wo jo mathe pe laga tha wahi patthar gum hai

ek madfon dafina unhen atraf mein tha

khak urti hai yahan aur wo gauhar gum hai