مارنے والی امنگوں کی طرح ہوتا ہے

مارنے والی امنگوں کی طرح ہوتا ہے

عشق بارودی سرنگوں کی طرح ہوتا ہے

روشنی مجھ پہ بھی اتنا ہی اثر کرتی ہے

میرا جلنا بھی پتنگوں کی طرح ہوتا ہے

بعد میں آتی ہے تہذیب محبت صاحب

ہر کوئی پہلے لفنگوں کی طرح ہوتا ہے

اس سے بچنا ہی مناسب ہے ذرا دھیان رہے

ہجر سفاک نہنگوں کی طرح ہوتا ہے

ہے مری عشق کی درگاہ سے نسبت سو مرا

بیٹھنا اٹھنا ملنگوں کی طرح ہوتا ہے

یہ ہے جذباتی مکینوں کا علاقہ اعجازؔ

سو یہاں امن بھی جنگوں کی طرح ہوتا ہے

marne wali umangon ki tarah hota hai

ishq barudi sarnigun ki tarah hota hai

raushni mujh pe bhi itna hi asar karti hai

mera jalna bhi patangon ki tarah hota hai

baad mein ati hai tahzib-e-mohabbat sahab

har koi pahle lafangon ki tarah hota hai

us se bachna hi munasib hai zara dhyan rahe

hijr saffak nahangon ki tarah hota hai

hai miri ishq ki dargah se nisbat so mira

baithna uthna malangon ki tarah hota hai

ye hai jazbati makinon ka ilaqa ejaz

so yahan amn bhi jangon ki tarah hota hai