Arooz is now on the App Store, for iPhone and iPad. Download →

All poetry

نیند کے دائرے میں حاضر ہوں

Ejaaz tawakkal (b. 1962)

نیند کے دائرے میں حاضر ہوں

خواب کے راستے میں حاضر ہوں

یاد ہے عشق تھا کبھی مجھ سے

میں اسی سلسلے میں حاضر ہوں

آپ مجھ میں سنورنا چاہتے ہیں

لیجیے آئنے میں حاضر ہوں

تم خسارہ سمجھ رہے ہو جسے

میں اسی فائدے میں حاضر ہوں

میرا ہونا نہیں مرا ہونا

میں فقط دیکھنے میں حاضر ہوں

آپ منظر کشی کریں آغاز

میں ہر اک حاشیے میں حاضر ہوں

تم مجھے خود جلانا چاہتی ہو

ٹھیک ہے طاقچے میں حاضر ہوں

وہ مجھے دیکھتا ہے ماضی میں

یعنی بیتے سمے میں حاضر ہوں