بہتی ہوئی آنکھوں کی روانی میں مرے ہیں

بہتی ہوئی آنکھوں کی روانی میں مرے ہیں

کچھ خواب مرے عین جوانی میں مرے ہیں

روتا ہوں میں ان لفظوں کی قبروں پے کئی بار

جو لفظ مری شعلہ بیانی میں مرے ہیں

کچھ تجھ سے یہ دوری بھی مجھے مار گئی ہے

کچھ جذبے مرے نقل مکانی میں مرے ہیں

قبروں میں نہیں ہم کو کتابوں میں اتارو

ہم لوگ محبت کی کہانی میں مرے ہیں

اس عشق نے آخر ہمیں برباد کیا ہے

ہم لوگ اسی کھولتے پانی میں مرے ہیں

کچھ حد سے زیادہ تھا ہمیں شوق محبت

اور ہم ہی محبت کی گرانی میں مرے ہیں

bahti hui ankhon ki rawani mein mire hain

kuchh khwab mire ain jawani mein mire hain

rota hun main in lafzon ki qabron pe kai bar

jo lafz miri shola bayani mein mire hain

kuchh tujh se ye duri bhi mujhe mar gai hai

kuchh jazbe mire naql-e-makani mein mire hain

qabron mein nahin ham ko kitabon mein utaro

ham log mohabbat ki kahani mein mire hain

is ishq ne akhir hamen barbad kiya hai

ham log isi kholte pani mein mire hain

kuchh had se ziyada tha hamen shauq-e-mohabbat

aur ham hi mohabbat ki girani mein mire hain