جذبات میں جو میرے مقابل کھڑے ہوئے

جذبات میں جو میرے مقابل کھڑے ہوئے

احساس تب ہوا مرے بچے بڑے ہوئے

دشمن کی زد سے اس کو بچا تو لیا مگر

سینے میں میرے تیر ہیں اب تک گڑے ہوئے

نایاب کس قدر ہیں تمہیں کچھ خبر نہیں

ہم مل گئے جو راہ میں تم کو پڑے ہوئے

اک عشق کو تو تاج محل سے ملا دوام

اک عشق کی مثال وہ کچے گھڑے ہوئے

تقدیر کا اصول ہے اے دوست صبر کر

روزے رکھے غریب نے تو دن بڑے ہوئے

وہ کیا گیا کہ اب تو سبھی کچھ بدل گیا

پہلے تو شب ہی تھی سو اب دن بھی کڑے ہوئے

فیضانؔ ایسے دل میں بسی ہے کسی کی یاد

جیسے انگوٹھیوں میں نگینے جڑے ہوئے

jazbat mein jo mere muqabil khare hue

ehsas tab hua mire bachche bare hue

dushman ki zad se us ko bacha to liya magar

sine mein mere tir hain ab tak gare hue

nayab kis qadar hain tumhen kuchh khabar nahin

ham mil gae jo rah mein tum ko pare hue

ik ishq ko to taj mahal se mila dawam

ik ishq ki misal wo kachche ghare hue

taqdir ka usul hai ai dost sabr kar

roze rakhe gharib ne to din bare hue

wo kya gaya ke ab to sabhi kuchh badal gaya

pahle to shab hi thi so ab din bhi kare hue

faizan aise dil mein basi hai kisi ki yad

jaise anguthiyon mein nagine jure hue