ظلم کی راہ میں دیوار ہوا کرتے تھے

ظلم کی راہ میں دیوار ہوا کرتے تھے

ہم کبھی عزم کے کہسار ہوا کرتے تھے

شہر سنسان ہے ان چاند سے چہروں کے بغیر

جو دریچوں سے نمودار ہوا کرتے تھے

مجھ سے مل کر ہیں عجب عالم حیرانی میں

جو مرے فن کے پرستار ہوا کرتے تھے

زندگی کس قدر آسان ہوا کرتی تھی

لوگ جب صاحب کردار ہوا کرتے تھے

اس کی زلفوں میں چمکتے تھے ستارے ہر پل

ہر گھڑی رات کے آثار ہوا کرتے تھے

اب وہاں فصل عمارات کی اگ آئی ہے

جب جگہ پر گھنے اشجار ہوا کرتے تھے

تیری پلکوں کے اشارے کو سمجھ جاتے تھے

ہم کبھی اتنے سمجھ دار ہوا کرتے تھے

تیری تصویر نگاہوں میں سجی رہتی تھی

ہم تو سوتے میں بھی بیدار ہوا کرتے تھے

تجھ کو اب یاد نہیں ہے کہ تری خاطر ہم

کیسے رسوا سر بازار ہوا کرتے تھے

جانے کس حال میں ہوگی وہ مری جان حیات

جس کی خاطر مرے اشعار ہوا کرتے تھے

جا چکے اب وہ زمانے کہ مرے شہر کے لوگ

عشق میں تیرے گرفتار ہوا کرتے تھے

بے خبر ہو کے زمانے کے ہر اک کام سے ہم

تیرے بارے میں خبردار ہوا کرتے تھے

اب اسے پانے کی خواہش بھی نہیں ہے فیضانؔ

ہم کبھی جس کے طلب گار ہوا کرتے تھے

zulm ki rah mein diwar hua karte the

ham kabhi azm ke kohsar hua karte the

shahr sunsan hai un chand se chehron ke baghair

jo darichon se numudar hua karte the

mujh se mil kar hain ajab alam-e-hairani mein

jo mire fan ke parastar hua karte the

zindagi kis qadar asan hua karti thi

log jab sahab-e-kirdar hua karte the

us ki zulfon mein chamakte the sitare har pal

har ghari rat ke asar hua karte the

ab wahan fasl amarat ki ug ai hai

jab jagah par ghane ashjar hua karte the

teri palkon ke ishare ko samajh jate the

ham kabhi itne samajh dar hua karte the

teri taswir nigahon mein saji rahti thi

ham to sote mein bhi bedar hua karte the

tujh ko ab yad nahin hai ke tiri khatir ham

kaise ruswa sar-e-bazar hua karte the

jane kis hal mein hogi wo miri jan-e-hayat

jis ki khatir mire ashar hua karte the

ja chuke ab wo zamane ke mire shahr ke log

ishq mein tere giraftar hua karte the

be khabar ho ke zamane ke har ik kam se ham

tere bare mein khabardar hua karte the

ab use pane ki khwahish bhi nahin hai faizan

ham kabhi jis ke talab gar hua karte the