Arooz is now on the App Store, for iPhone and iPad. Download →

All poetry

بیگانۂ شعور وفا ہو گیا وہ شخص

Faiz Tabassum Tonsvi

بیگانۂ شعور وفا ہو گیا وہ شخص

یہ کیا ہوا کہ مجھ سے خفا ہو گیا وہ شخص

جس سے ملی تھی میری تمنا کو روشنی

اے تیرگیٔ بخت خفا ہو گیا وہ شخص

اترا تھا بوئے گل کی طرح میری روح میں

ایسا گیا کہ موج ہوا ہو گیا وہ شخص

ہم نے جسے صحیفۂ الفت سمجھ لیا

بے مہریٔ جہاں کی ادا ہو گیا وہ شخص

اللہ رے اس کی یاد کے گجرے ہرے رہیں

اجڑے ہوئے دلوں کی دوا ہو گیا وہ شخص

سنتے ہیں ایک فیضؔ غریب الدیار تھا

حق مغفرت کرے کہ قضا ہو گیا وہ شخص