کیف و سرور قلب کے امکان ہی گئے

کیف و سرور قلب کے امکان ہی گئے

دل کیا گیا حیات کے سامان ہی گئے

وہ واردات قلب کے لمحے فنا ہوئے

وہ جن پہ ناز تھا مجھے ارمان ہی گئے

پہلے تو حوصلہ نہ ہوا ان سے ربط کا

آخر ہم اپنے دل کا کہا مان ہی گئے

ہم نے تو درد دل کو ہی درماں بنا لیا

اپنے کئے پہ آپ پشیمان ہی گئے

دیکھا ہے ہم نے موت کو اتنا قریب سے

اس لومڑی کی چال کو پہچان ہی گئے

الٹاؤ جام بزم طرب ملتوی کرو

جو جان مے کدہ تھے وہ مہمان ہی گئے

پھر لے چلا ہے جانب مقتل تو چل چلیں

اے قلب‌ زار تیرا کہا مان ہی گئے

وہ اور ہوں گے جن کو نوازا جہان نے

دنیا سے فیضؔ بے سر و سامان ہی گئے

kaif-o-surur qalb ke imkan hi gae

dil kya gaya hayat ke saman hi gae

wo wardat-e-qalb ke lamhe fana hue

wo jin pe naz tha mujhe arman hi gae

pahle to hausla na hua un se rabt ka

akhir ham apne dil ka kaha man hi gae

ham ne to dard-e-dil ko hi darman bana liya

apne kiye pe ap pasheman hi gae

dekha hai ham ne maut ko itna qarib se

is lomri ki chal ko pahchan hi gae

altao jam-e-bazm-e-tarab multawi karo

jo jan-e-mai kada the wo mehman hi gae

phir le chala hai janib-e-maqtal to chal chalen

ai qalb-e-zar tera kaha man hi gae

wo aur honge jin ko nawaza jahan ne

duniya se faiz-e-be sar-o-saman hi gae