اشکوں کو چن کے آنکھوں میں بویا کریں گے ہم

اشکوں کو چن کے آنکھوں میں بویا کریں گے ہم

رونا تمام شہر کا رویا کریں گے ہم

خواب عدم سے ڈھونڈ کے لائیں گے روشنی

پھر زندگی میں دھوپ پرویا کریں گے ہم

خون جراحت دل ناکردہ کار سے

آئینۂ حیات کو دھویا کریں گے ہم

پہلے تمام شہر کو صحرا بنائیں گے

پھر وحشتوں کی ریت پہ سویا کریں گے ہم

لفظوں کو حرف حرف پروئیں گے شعر میں

لفظوں سے انحراف بھی گویا کریں گے ہم

ashkon ko chun ke ankhon mein boya karenge ham

rona tamam shahr ka roya karenge ham

khwab-e-adam se dhund ke laenge raushni

phir zindagi mein dhup piroya karenge ham

khun-e-jarahat-e-dil nakarda kar se

aina-e-hayat ko dhoya karenge ham

pahle tamam shahr ko sahra banaenge

phir wahshaton ki ret pe soya karenge ham

lafzon ko harf harf piroenge sher mein

lafzon se inhiraf bhi goya karenge ham