اجاڑ دوں میں یہ دنیا وہ زور ہے مجھ میں

اجاڑ دوں میں یہ دنیا وہ زور ہے مجھ میں

کئی اداس ہواؤں کا شور ہے مجھ میں

میں اپنے آپ کا سب سے بڑا مخالف ہوں

مری ہی طرح کا اک شخص اور ہے مجھ میں

میں رقص گاہ جنوں عشق کی ہوں روح رواں

ترے بھی جسم کے جنگل کا مور ہے مجھ میں

یہ کہہ کے اس نے مری وحشتوں کو تھام لیا

ترے دھڑکتے ہوئے دل کی ڈور ہے مجھ میں

عجب نہیں کہ مجھے لوگ پوجنے لگ جائیں

زمانے بھر کے خداؤں کی گور ہے مجھ میں

ujar dun main ye duniya wo zor hai mujh mein

kai udas hawaon ka shor hai mujh mein

main apne ap ka sab se bara mukhalif hun

miri hi tarah ka ik shakhs aur hai mujh mein

main raqs gah junun ishq ki hun ruh-e-rawan

tire bhi jism ke jangal ka mor hai mujh mein

ye kah ke us ne miri wahshaton ko tham liya

tire dharakte hue dil ki dor hai mujh mein

ajab nahin ke mujhe log pujne lag jaen

zamane bhar ke khudaon ki gor hai mujh mein