ظالم سے مصطفیٰ کا عمل چاہتے ہیں لوگ

ظالم سے مصطفیٰ کا عمل چاہتے ہیں لوگ

سوکھے ہوئے درخت سے پھل چاہتے ہیں لوگ

کافی ہے جن کے واسطے چھوٹا سا اک مکاں

پوچھے کوئی تو شیش محل چاہتے ہیں لوگ

سائے کی مانگتے ہیں ردا آفتاب سے

پتھر سے آئنے کا بدل چاہتے ہیں لوگ

کب تک کسی کی زلف پریشاں کا تذکرہ

کچھ اپنی الجھنوں کا بھی حل چاہتے ہیں لوگ

بار غم حیات سے شانے ہوئے ہیں شل

اکتا کے زندگی سے اجل چاہتے ہیں لوگ

رکھتے نہیں نگاہ تقاضوں پہ وقت کے

تالاب کے بغیر کنول چاہتے ہیں لوگ

جس کو بھی دیکھیے ہے وہی دشمن سکوں

کیا دور ہے کہ جنگ و جدل چاہتے ہیں لوگ

درکار ہے نجات غم روزگار سے

مریخ چاہتے ہیں نہ زحل چاہتے ہیں لوگ

اعجازؔ اپنے عہد کا میں ترجمان ہوں

میں جانتا ہوں جیسی غزل چاہتے ہیں لوگ

zalim se mustafa ka amal chahte hain log

sukhe hue darakht se phal chahte hain log

kafi hai jin ke waste chhota sa ik makan

puchhe koi to shish mahal chahte hain log

sae ki mangte hain rida aftab se

patthar se aine ka badal chahte hain log

kab tak kisi ki zulf-e-pareshan ka tazkira

kuchh apni uljhanon ka bhi hal chahte hain log

bar-e-gham-e-hayat se shane hue hain shil

ukta ke zindagi se ajal chahte hain log

rakhte nahin nigah taqazon pe waqt ke

talab ke baghair kanwal chahte hain log

jis ko bhi dekhiye hai wahi dushman-e-sukun

kya dur hai ke jang-o-jadal chahte hain log

darkar hai najat gham-e-rozgar se

mirrikh chahte hain na zuhal chahte hain log

ejaz apne ahd ka main tarjuman hun

main janta hun jaisi ghazal chahte hain log