اسے یہ حق ہے کہ وہ مجھ سے اختلاف کرے

اسے یہ حق ہے کہ وہ مجھ سے اختلاف کرے

مگر وجود کا میرے بھی اعتراف کرے

اسے تو اپنی بھی صورت نظر نہیں آتی

وہ اپنے شیشۂ دل کی تو گرد صاف کرے

کیا جو اس نے مرے ساتھ نا مناسب تھا

معاف کر دیا میں نے خدا معاف کرے

وہ شخص جو کسی مسجد میں جا نہیں سکتا

تو اپنے گھر میں ہی کچھ روز اعتکاف کرے

وہ آدمی تو نہیں ہے سیاہ پتھر ہے

جو چاہتا ہے کہ دنیا مرا طواف کرے

وہ کوہ کن ہے نہ ہے اس کے ہاتھ میں تیشہ

مگر زبان سے جب چاہے وہ شگاف کرے

میں اس کے سارے نقائص اسے بتا دوں گا

انا کا اپنے بدن سے جدا غلاف کرے

جسے بھی دیکھیے پتھر اٹھائے پھرتا ہے

کوئی تو ہو مری وحشت کا اعتراف کرے

میں اس کی بات کا کیسے یقیں کروں اعجازؔ

جو شخص اپنے اصولوں سے انحراف کرے

use ye haq hai ke wo mujh se ikhtilaf kare

magar wajud ka mere bhi etiraf kare

use to apni bhi surat nazar nahin ati

wo apne shisha-e-dil ki to gard saf kare

kiya jo us ne mire sath na munasib tha

muaf kar diya main ne khuda muaf kare

wo shakhs jo kisi masjid mein ja nahin sakta

tu apne ghar mein hi kuchh roz etikaf kare

wo admi to nahin hai siyah patthar hai

jo chahta hai ke duniya mira tawaf kare

wo koh kin hai na hai us ke hath mein tesha

magar zaban se jab chahe wo shigaf kare

main us ke sare naqais use bata dunga

ana ka apne badan se juda ghilaf kare

jise bhi dekhiye patthar uthae phirta hai

koi to ho miri wahshat ka etiraf kare

main us ki bat ka kaise yaqin karun ejaz

jo shakhs apne usulon se inhiraf kare