کنایتاً بھی ترا نام جب سنا میں نے

کنایتاً بھی ترا نام جب سنا میں نے

وفور شوق میں سر کو جھکا دیا میں نے

ہجوم غم میں ادائے قلندری نہ گئی

مسرتوں سے بھی رکھا ہے فاصلہ میں نے

بتوں نے حوصلہ افزائیاں تو کیں میری

مگر تجھی کو پکارا مرے خدا میں نے

تمام عمر اندھیروں سے میری جنگ رہی

بجھا چراغ تو دل کو جلا لیا میں نے

تمام شہر کے پتھر مری طرف آئے

خرد کو جب بھی دکھایا ہے آئنہ میں نے

مرے خدا مرے شعروں کو زندگی دے دے

ہر ایک شعر پہ مانگی ہے یہ دعا میں نے

kinita bhi tira nam jab suna main ne

wafur-e-shauq mein sar ko jhuka diya main ne

hujum-e-gham mein ada-e-qalandari na gai

masarraton se bhi rakha hai fasla main ne

buton ne hausla afzaiyan to kin meri

magar tujhi ko pukara mire khuda main ne

tamam umr andheron se meri jang rahi

bujha charagh to dil ko jala liya main ne

tamam shahr ke patthar miri taraf ae

khirad ko jab bhi dikhaya hai aina main ne

mire khuda mire sheron ko zindagi de de

har ek sher pe mangi hai ye dua main ne