کبھی دھنک سی اترتی تھی ان نگاہوں میں

کبھی دھنک سی اترتی تھی ان نگاہوں میں

وہ شوخ رنگ بھی دھیمے پڑے ہواؤں میں

میں تیز گام چلی جا رہی تھی اس کی سمت

کشش عجیب تھی اس دشت کی صداؤں میں

وہ اک صدا جو فریب صدا سے بھی کم ہے

نہ ڈوب جائے کہیں تند رو ہواؤں میں

سکوت شام ہے اور میں ہوں گوش بر آواز

کہ ایک وعدے کا افسوں سا ہے فضاؤں میں

مری طرح یوں ہی گم کردہ راہ چھوڑے گی

تم اپنی بانہہ نہ دینا ہوا کی بانہوں میں

نقوش پاؤں کے لکھتے ہیں منزل نا یافت

مرا سفر تو ہے تحریر میری راہوں میں

kabhi dhanak si utarti thi un nigahon mein

wo shokh rang bhi dhime pare hawaon mein

main tez gam chali ja rahi thi us ki samt

kashish ajib thi is dasht ki sadaon mein

wo ik sada jo fareb-e-sada se bhi kam hai

na dub jae kahin tund ro hawaon mein

sukut-e-sham hai aur main hun gosh bar awaz

ke ek waade ka afsun sa hai fazaon mein

miri tarah yun hi gum karda rah chhoregi

tum apni banha na dena hawa ki banhon mein

nuqush paon ke likhte hain munzzal na yaft

mira safar to hai tahrir meri rahon mein