Arooz is now on the App Store, for iPhone and iPad. Download →

All poetry

برگ صدا کو لب سے اڑے دیر ہو گئی

Faheem Shanas Kazmi (b. 1965)

برگ صدا کو لب سے اڑے دیر ہو گئی

ہم کو بھی اب تو خاک ہوئے دیر ہو گئی

اب ساحلوں پہ کس کو صدا دے رہے ہو تم

لمحوں کے بادبان کھلے دیر ہو گئی

اے حسن خود پرست ذرا سوچ تو سہی

مہر و وفا سے تجھ کو ملے دیر ہو گئی

تیرا وصال خیر اب اک واقعہ ہوا

اب اپنے آپ سے بھی ملے دیر ہو گئی

صدیوں کی ریت ڈھانپ کر آسودہ ہو گئے

سر کو ہمارے تن سے کٹے دیر ہو گئی

صرصر ہو یا صبا ہو کہ ہوں تیز آندھیاں

ہم کو فصیل شب پہ جلے دیر ہو گئی

تیری گلی کے موڑ پہ پہنچے تھے جلد ہم

پر تیرے گھر کو آتے ہوئے دیر ہو گئی

اک دور تھا شناسؔ صدا تھی مری بلند

اور اب تو میرے ہونٹ سلے دیر ہو گئی