سمجھ رہا تھا میں یہ دن گزرنے والا نہیں

سمجھ رہا تھا میں یہ دن گزرنے والا نہیں

کھلا کہ کوئی بھی لمحہ ٹھہرنے والا نہیں

کوئی بھی رستہ کسی سمت کو نہیں جاتا

کوئی سفر مری تکمیل کرنے والا نہیں

ہوا کی ابر کی کوشش تو پوری پوری ہے

مگر دھویں کی طرح میں بکھرنے والا نہیں

میں اپنے آپ کو بس ایک بار دیکھوں گا

پھر اس کے بعد کسی سے بھی ڈرنے والا نہیں

چراغ جاں لیے کس دشت میں کھڑا ہوں میں

کوئی بھی قافلہ یاں سے گزرنے والا نہیں

میں کیا کروں کوئی تصویر گر ادھوری ہے

میں اپنے رنگ تو اب اس میں بھرنے والا نہیں

samajh raha tha main ye din guzarne wala nahin

khula ke koi bhi lamha thaharne wala nahin

koi bhi rasta kisi samt ko nahin jata

koi safar miri takmil karne wala nahin

hawa ki abr ki koshish to puri puri hai

magar dhuen ki tarah main bikharne wala nahin

main apne ap ko bas ek bar dekhunga

phir is ke baad kisi se bhi darne wala nahin

charagh-e-jan liye kis dasht mein khara hun main

koi bhi qafila yan se guzarne wala nahin

main kya karun koi taswir gar adhuri hai

main apne rang to ab is mein bharne wala nahin