حسن الفاظ کے پیکر میں اگر آ سکتا

حسن الفاظ کے پیکر میں اگر آ سکتا

کیسا ہوتا ہے خدا تم کو میں دکھلا سکتا

اس سفر پہ ہوں کہ ہلکان ہوا جاتا ہوں

اور کہاں جانا ہے یہ بھی نہیں بتلا سکتا

ہارنا بھی ہے یقینی پہ مری فطرت ہے

ایک ہی چال ہمیشہ نہیں دہرا سکتا

زندگی اب تو مجھے اور کھلونے لا دے

ایسے خوابوں سے تو میں دل نہیں بہلا سکتا

میں بھی تقدیر کے لکھے پہ یقیں لے آتا

وقت اک بار جو اس سے مجھے ملوا سکتا

husn alfaz ke paikar mein agar a sakta

kaisa hota hai khuda tum ko main dikhla sakta

is safar pe hun ke halkan hua jata hun

aur kahan jana hai ye bhi nahin batla sakta

harna bhi hai yaqini pe miri fitrat hai

ek hi chal hamesha nahin dohra sakta

zindagi ab to mujhe aur khilaune la de

aise khwabon se to main dil nahin bahla sakta

main bhi taqdir ke likhe pe yaqin le ata

waqt ik bar jo us se mujhe malwa sakta