دھند میں ڈوبی ساری فضا تھی اس کے بال بھی گیلے تھے

دھند میں ڈوبی ساری فضا تھی اس کے بال بھی گیلے تھے

جس کی آنکھیں جھیلوں جیسی جس کے ہونٹ رسیلے تھے

جس کو کھو کر خاک ہوئے ہم آج اسے بھی دیکھا تو

ہنستی آنکھیں افسردہ تھیں ہونٹ بھی نیلے نیلے تھے

جن کو چھو کر کتنے زیدیؔ اپنی جان گنوا بیٹھے

میرے عہد کی شہنازوںؔ کے جسم بڑے زہریلے تھے

آخر آخر ایسا ہوا کہ تیرا نام بھی بھول گئے

اول اول عشق میں جاناں ہم کتنے جوشیلے تھے

آنکھیں بجھا کے خود کو بھلا کے آج شناسؔ میں آیا ہوں

تلخ تھیں لہجوں کی برساتیں رنگ بھی کڑوے کسیلے تھے

dhund mein dubi sari faza thi us ke bal bhi gile the

jis ki ankhen jhilon jaisi jis ke hont rasile the

jis ko kho kar khak hue ham aj use bhi dekha to

hansti ankhen afsurda thin hont bhi nile nile the

jin ko chhu kar kitne zidi apni jan ganwa baithe

mere ahd ki shahnazon ke jism bare zahrile the

akhir akhir aisa hua ke tera nam bhi bhul gae

awwal awwal ishq mein janan ham kitne joshile the

ankhen bujha ke khud ko bhula ke aj shanas mein aya hun

talkh thin lahjon ki barsaten rang bhi karwe kasele the