ایک رہزن کو امیر کارواں سمجھا تھا میں

ایک رہزن کو امیر کارواں سمجھا تھا میں

اپنی بد بختی کو منزل کا نشاں سمجھا تھا میں

تیری معصومی کے صدقے میری محرومی کی خیر

اے کہ تجھ کو صورت آرام جاں سمجھا تھا میں

دشمن دل دشمن دیں دشمن ہوش و حواس

ہائے کس نا مہرباں کو مہرباں سمجھا تھا میں

دوست کا در آ گیا تو خود بخود جھکنے لگی

جس جبیں کو بے نیاز آستاں سمجھا تھا میں

قافلے کا قافلہ ہی راہ میں گم کر دیا

تجھ کو تو ظالم دلیل رہرواں سمجھا تھا میں

میرے دل میں آ کے بیٹھے اور یہیں کے ہو گئے

آپ کو تو یوسف بے کارواں سمجھا تھا میں

اک دروغ مصلحت آمیز تھا تیرا سلوک

یہ حقیقت تھی مگر یہ بھی کہاں سمجھا تھا میں

زندگی انعام قدرت ہی سہی لیکن اسے

کیا غلط سمجھا اگر یار گراں سمجھا تھا میں

پھیر تھا قسمت کا وہ چکر تھا میرے پاؤں کا

جس کو شعلہؔ گردش ہفت آسماں سمجھا تھا میں

ek rahzan ko amir-e-karwan samjha tha main

apni bad bakhti ko manzil ka nishan samjha tha main

teri maasumi ke sadqe meri mahrumi ki khair

ai ke tujh ko surat-e-aram-e-jan samjha tha main

dushman-e-dil dushman den dushman hosh-o-hawas

hae kis na mehrban ko mehrban samjha tha main

dost ka dar a gaya to khud bakhud jhukne lagi

jis jabin ko be niyaz-e-astan samjha tha main

qafile ka qafila hi rah mein gum kar diya

tujh ko to zalim dalil-e-rahrawan samjha tha main

mere dil mein a ke baithe aur yahin ke ho gae

ap ko to yusuf-e-be karwan samjha tha main

ik darogh-e-maslahat amez tha tera suluk

ye haqiqat thi magar ye bhi kahan samjha tha main

zindagi inam-e-qudrat hi sahi lekin use

kya ghalat samjha agar yar-e-giran samjha tha main

pher tha qismat ka wo chakkar tha mere paon ka

jis ko shola gardish-e-haft asman samjha tha main