اور سمت سفر راستہ اور ہے

اور سمت سفر راستہ اور ہے

عہد حاضر کا شاید خدا اور ہے

آندھیاں کس لیے مطمئن ہو گئیں

میرے گھر میں ابھی اک دیا اور ہے

جھوٹی خبروں کی تشہیر مت کیجئے

میری بستی کا وہ واقعہ اور ہے

عافیت کی تمنا مناسب نہیں

باقی اک عرصۂ کربلا اور ہے

ہم تمنائے ختم سفر کیوں کریں

اس سفر کی تھکن کا مزا اور ہے

آپ کا شہر دل کش بہت ہے مگر

گاؤں کی میرے آب و ہوا اور ہے

اپنی پہچان بھی اب تو ممکن نہیں

ہم ہی بدلے ہیں یا آئنہ اور ہے

شیش محلوں میں تابشؔ کو مت ڈھونڈیئے

اس قلندر کے گھر کا پتا اور ہے

aur samt-e-safar rasta aur hai

ahd-e-hazir ka shayad khuda aur hai

andhiyan kis liye mutmain ho gain

mere ghar mein abhi ik diya aur hai

jhuti khabron ki tashhir mat kijiye

meri basti ka wo waqia aur hai

afiyat ki tamanna munasib nahin

baqi ik arsa-e-karbala aur hai

ham tamanna-e-khatm-e-safar kyun karen

is safar ki thakan ka maza aur hai

ap ka shahr-e-dil kash bahut hai magar

gaon ki mere ab-o-hawa aur hai

apni pahchan bhi ab to mumkin nahin

ham hi badle hain ya aina aur hai

shish mahlon mein tabish ko mat dhundiye

is qalandar ke ghar ka pata aur hai