کلاہ کج بدل جاتی ہے یا افسر بدلتا ہے

کلاہ کج بدل جاتی ہے یا افسر بدلتا ہے

ابھی کھلتا نہیں کیا وقت کا تیور بدلتا ہے

یہ دیکھا ہے کہ محور استوا اوپر بدلتا ہے

فلک صدیوں پرانی نیلگوں چادر بدلتا ہے

دلوں میں سوز غم والے دھوئیں بھی آرزوئیں بھی

عجم والا مسلماں ہر صدی میں گھر بدلتا ہے

نشاں کردہ گھروں کو چھوڑ بھاگے گھر جو لوٹے ہیں

تو دیکھا پچھلی شب دہلیز کا نمبر بدلتا ہے

ہر اک فرعون کے احوال غرقابی جداگانہ

کبھی دریا بدلتا ہے کبھی لشکر بدلتا ہے

زمانہ احتراماً گھوم جاتا ہے اسی جانب

جو اچھائی کو اک انسان رتی بھر بدلتا ہے

ہم اب مغرب کے دست آموز دنیا کو نہیں لگتے

اگ آئیں بال و پر اپنے تو بال و پر بدلتا ہے

کوئی دروازہ بھیتر کی طرف کھلتا نہیں احساںؔ

وہی اندر کی کالک ہے فقط باہر بدلتا ہے

kulah-e-kaj badal jati hai ya afsar badalta hai

abhi khulta nahin kya waqt ka tewar badalta hai

ye dekha hai ke mehwar istiwa upar badalta hai

falak sadiyon purani nilgun chadar badalta hai

dilon mein soz-e-gham wale dhuen bhi arzuen bhi

ajam wala musalman har sadi mein ghar badalta hai

nishan karda gharon ko chhor bhage ghar jo laute hain

to dekha pichhli shab dahliz ka nambar badalta hai

har ik firaun ke ahwal gharqabi judagana

kabhi dariya badalta hai kabhi lashkar badalta hai

zamana ahtarama ghum jata hai usi janib

jo achchhai ko ik insan ratti bhar badalta hai

ham ab maghrib ke dast amoz duniya ko nahin lagte

ug aen bal-o-par apne to bal-o-par badalta hai

koi darwaza bhitar ki taraf khulta nahin ehsan

wahi andar ki kalak hai faqat bahar badalta hai