کسی سے اپنی خبر ہم وصول کیا کرتے

کسی سے اپنی خبر ہم وصول کیا کرتے

خود آئینوں کا بھی احساں قبول کیا کرتے

وہ کھیت کھیت رہیں جن کی خار دار صفیں

انہی میں پھول تھے دو چار پھول کیا کرتے

تمام جانوں کے دشمن تمام ہاتھ ہوئے

یہ امتیں تھیں اب ان کے رسول کیا کرتے

یہ کوئی عمر تھی تیری محبتوں والی

سروں کی راکھ میں شامل یہ دھول کیا کرتے

تمہارے جیسا کوئی نقش ہر نگار میں تھا

مگر تھے ہم بھی بہت با اصول کیا کرتے

انہیں کہ جن سے بڑی چوٹ کر گئی تھی حیات

اب اور پرسش غم سے ملول کیا کرتے

جہاں تھا توڑنا دستور کا بھی اک دستور

وہاں ہمارے تمہارے اصول کیا کرتے

ہم ایسے لوگ جو خوابوں کے چلنے والے تھے

سحر سے اجر مسافت وصول کیا کرتے

kisi se apni khabar ham wusul kya karte

khud ainon ka bhi ehsan qubul kya karte

wo khet khet rahen jin ki khar dar safen

unhi mein phul the do char phul kya karte

tamam janon ke dushman tamam hath hue

ye ummaten thin ab un ke rasul kya karte

ye koi umr thi teri mohabbaton wali

saron ki rakh mein shamil ye dhul kya karte

tumhare jaisa koi naqsh har nigar mein tha

magar the ham bhi bahut ba usul kya karte

unhen ke jin se bari chot kar gai thi hayat

ab aur pursish-e-gham se malul kya karte

jahan tha torna dastur ka bhi ik dastur

wahan hamare tumhare usul kya karte

ham aise log jo khwabon ke chalne wale the

sahar se ajr masafat wusul kya karte