Arooz is now on the App Store, for iPhone and iPad. Download →

All poetry

ہزاروں سال سے میں جس کے انتظار میں تھا

Ehtisham Akhtar (b. 1944)

ہزاروں سال سے میں جس کے انتظار میں تھا

وہ عکس خواب تو میرے ہی اختیار میں تھا

وہ میری ذات کے پرتو سے ماہتاب ہوا

وگرنہ کرۂ بے نور کس شمار میں تھا

کوئی لگاؤ نہ تھا اب ہرے شجر سے مجھے

میں برگ خشک تھا اڑتے ہوئے غبار میں تھا

سفر میں یوں ہی جھلستا رہا خبر نہ ہوئی

کہ ٹھنڈے پانی کا چشمہ بھی رہ گزار میں تھا

میں بد گماں نہ کبھی اس سے ہو سکا اخترؔ

عجب طرح کا مزہ اس کے جھوٹے پیار میں تھا