خیال و خواب کے پیکر بدلتے رہتے ہیں

خیال و خواب کے پیکر بدلتے رہتے ہیں

ہم اپنی آگ میں ہر دم پگھلتے رہتے ہیں

ہمیں ہے ناز کہ ہم ہیں پہاڑ کی مانند

ہماری آنکھوں سے چشمے ابلتے رہتے ہیں

تمہارے واسطے یہ چیز ہے نئی ورنہ

یہاں پہ سانپ تو اکثر نکلتے رہتے ہیں

بلندیوں میں جو اڑتے ہیں ان کو کیا معلوم

گھنے بنوں کی ہیں ہم آگ جلتے رہتے ہیں

تم اپنے جسم کے ملبوس کو بچائے رکھو

غلیظ پانی ہیں ہم تو اچھلتے رہتے ہیں

ہمارے ساتھ کہاں تک چلو گے ضد نہ کرو

کہ راستوں کی طرح ہم تو چلتے رہتے ہیں

بدلتی رت کی طرح ان کے پیار میں ہم بھی

خود اپنی شکل کو ہر دم بدلتے رہتے ہیں

khayal-o-khwab ke paikar badalte rahte hain

ham apni ag mein har dam pighalte rahte hain

hamen hai naz ke ham hain pahar ki manind

hamari ankhon se chashme ubalte rahte hain

tumhare waste ye chiz hai nai warna

yahan pe sanp to aksar nikalte rahte hain

bulandiyon mein jo urte hain un ko kya maalum

ghane banon ki hain ham ag jalte rahte hain

tum apne jism ke malbus ko bachae rakho

ghaliz pani hain ham to uchhalte rahte hain

hamare sath kahan tak chaloge zid na karo

ke raston ki tarah ham to chalte rahte hain

badalti rut ki tarah un ke pyar mein ham bhi

khud apni shakl ko har dam badalte rahte hain