ستا رہی ہے بہت مچھلیوں کی باس مجھے

ستا رہی ہے بہت مچھلیوں کی باس مجھے

بلا رہا ہے سمندر پھر اپنے پاس مجھے

ہوس کا شیشۂ نازک ہوں پھوٹ جاؤں گا

نہ مار کھینچ کے اس طرح سنگ یاس مجھے

میں قید میں کبھی دیوار و در کی رہ نہ سکا

نہ آ سکا کبھی شہروں کا رنگ راس مجھے

میں تیرے جسم کے دریا کو پی چکا ہوں بہت

ستا رہی ہے پھر اب کیوں بدن کی پیاس مجھے

مرے بدن میں چھپا ہے سمندروں کا فسوں

جلا سکے گی بھلا کیا یہ خشک گھاس مجھے

گرے گا ٹوٹ کے سر پر یہ آسمان کبھی

ڈرائے رکھتا ہے ہر دم مرا قیاس مجھے

جھلس رہا ہوں میں صدیوں سے غم کے صحرا میں

مگر ہے ابر گریزاں کی پھر بھی آس مجھے

sata rahi hai bahut machhliyon ki bas mujhe

bala raha hai samundar phir apne pas mujhe

hawas ka shisha-e-nazuk hun phut jaunga

na mar khinch ke is tarah sang yas mujhe

main qaid mein kabhi diwar-o-dar ki rah na saka

na a saka kabhi shahron ka rang ras mujhe

main tere jism ke dariya ko pi chuka hun bahut

sata rahi hai phir ab kyun badan ki pyas mujhe

mire badan mein chhupa hai samundaron ka fusun

jala sakegi bhala kya ye khushk ghas mujhe

girega tut ke sar par ye asman kabhi

darae rakhta hai har dam mira qayas mujhe

jhulas raha hun main sadiyon se gham ke sahra mein

magar hai abr gurezan ki phir bhi as mujhe