کبھی زمیں پہ کبھی نیلے آسمان میں ہوں

کبھی زمیں پہ کبھی نیلے آسمان میں ہوں

ہوا کی طرح میں ہر پل نئے مکان میں ہوں

ترا وقار تو میرے ہی دم سے قائم ہے

میں مثل آب گہر تیری آن بان میں ہوں

لبوں سے اس کے نکل کر ہوا ہوں آوارہ

میں ایک لفظ ہوں ہر دم نئی اڑان میں ہوں

مجھے تو گہرے سمندر سے جا کے ملنا ہے

ابھی میں رک نہیں سکتا ابھی ڈھلان میں ہوں

سمجھ تو مجھ کو ذرا میری قدر کر ناداں

میں آسمانی صحیفہ تری زبان میں ہوں

مرے حصار میں تھی ساری کائنات کبھی

ستم ہے قید میں خود اپنے ہی مکان میں ہوں

اگر ہے شوق تو مجھ کو خرید لے آکر

کہ میں تو شہر ہوس کی ہر اک دکان میں ہوں

kabhi zamin pe kabhi nile asman mein hun

hawa ki tarah main har pal nae makan mein hun

tira waqar to mere hi dam se qaim hai

main misl-e-ab-e-guhar teri an ban mein hun

labon se us ke nikal kar hua hun awara

main ek lafz hun har dam nai uran mein hun

mujhe to gahre samundar se ja ke milna hai

abhi main ruk nahin sakta abhi dhalan mein hun

samajh to mujh ko zara meri qadr kar nadan

main asmani sahifa tiri zaban mein hun

mire hisar mein thi sari kainat kabhi

sitam hai qaid mein khud apne hi makan mein hun

agar hai shauq to mujh ko kharid le akar

ke main to shahr-e-hawas ki har ik dukan mein hun