دل برباد کو چھوٹا سا مکاں بھی دے گا

دل برباد کو چھوٹا سا مکاں بھی دے گا

جب نیا زخم بھرے گا تو نشاں بھی دے گا

پہلے گزروں گا میں امید و یقیں کی رہ سے

پھر ترا پیار مجھے وہم و گماں بھی دے گا

پیکر رنگ جو پل بھر میں بکھر جائے گا

جاگتی آنکھوں کو خوابوں کا جہاں بھی دے گا

تم جلانا مجھے چاہو تو جلا دو لیکن

نخل تازہ جو جلے گا تو دھواں بھی دے گا

وقت دیتا ہے جنہیں آج کھلونے اخترؔ

انہیں اطفال کو کل تیر و سناں بھی دے گا

dil-e-barbad ko chhota sa makan bhi dega

jab naya zakhm bharega to nishan bhi dega

pahle guzrunga mein ummid-o-yaqin ki rah se

phir tira pyar mujhe wahm-o-guman bhi dega

paikar-e-rang jo pal bhar mein bikhar jaega

jagti ankhon ko khwabon ka jahan bhi dega

tum jalana mujhe chaho to jala do lekin

nakhl-e-taza jo jalega to dhuan bhi dega

waqt deta hai jinhen aj khilaune akhtar

unhen atfal ko kal tir-o-sinan bhi dega