ہم کو چھیڑا تو مچل جائیں گے ارماں کی طرح

ہم کو چھیڑا تو مچل جائیں گے ارماں کی طرح

ہم پریشاں ہیں تری زلف پریشاں کی طرح

ہر گلی آئی نظر کوچۂ جاناں کی طرح

ہم کو دنیا یہ لگی شہر نگاراں کی طرح

کم نہ ہوگی یہ خلش دل کی کسی بھی صورت

دل میں سو غم ہیں مکیں خار مغیلاں کی طرح

لوگ رک رک کے چلے جانب منزل لیکن

ہم رہے گرم سفر گردش دوراں کی طرح

اب تو ہر شخص پہ ہوتا ہے گماں قاتل کا

کوئی ملتا ہی نہیں آدمی انساں کی طرح

ہم نے بخشے ہیں اندھیروں کو اجالے لیکن

ہم ہی بے نور رہے گور غریباں کی طرح

ہم کنولؔ آپ میں رہتے ہیں مگر اس سے الگ

ہم تو گلشن میں بھی رہتے ہیں بیاباں کی طرح

ham ko chhera to machal jaenge arman ki tarah

ham pareshan hain tiri zulf-e-pareshan ki tarah

har gali ai nazar kucha-e-janan ki tarah

ham ko duniya ye lagi shahr-e-nigaran ki tarah

kam na hogi ye khalish dil ki kisi bhi surat

dil mein so gham hain makin khar-e-mughilan ki tarah

log ruk ruk ke chale janib-e-manzil lekin

ham rahe garm-e-safar gardish-e-dauran ki tarah

ab to har shakhs pe hota hai guman qatil ka

koi milta hi nahin admi insan ki tarah

ham ne bakhshe hain andheron ko ujale lekin

ham hi be nur rahe gor-e-ghariban ki tarah

ham kanwal ap mein rahte hain magar us se alag

ham to gulshan mein bhi rahte hain bayaban ki tarah