دنیا پتھر پھینک رہی ہے جھنجھلا کر فرزانوں پر

دنیا پتھر پھینک رہی ہے جھنجھلا کر فرزانوں پر

اب وہ کیا الزام دھرے گی ہم جیسے دیوانوں پر

دل کی کلیاں افسردہ سی ہر چہرہ مایوس مگر

باغ مہکتے دیکھ رہا ہوں گھاٹوں پر شمشانوں پر

پتھر دل ہیں لوگ یہاں کے یہ پتھر کیا پگھلیں گے

کس نے بارش ہوتے دیکھی تپتے ریگستانوں پر

جن کی ایک نظر کے بدلے ہم نے دنیا ٹھکرا دی

نام ہمارا سن کر رکھیں ہاتھ وہ اپنے کانوں پر

آہیں آنسو پیش کئے تو گھبرا کے منہ پھیر لیا

ان کو شاید غصہ آیا میرے ان نذرانوں پر

کیا تقدیر کا شکوہ یارو اپنی اپنی قسمت ہے

اپنا ہاتھ گیا ہے اکثر ٹوٹے سے پیمانوں پر

آج کنولؔ ہم کچھ بھی کہہ لیں بات مگر یہ سچی ہے

آج کا اک اک پل بھاری ہے پچھلے کئی زبانوں پر

duniya patthar phenk rahi hai jhanjhla kar farzanon par

ab wo kya ilzam dharegi ham jaise diwanon par

dil ki kaliyan afsurda si har chehra mayus magar

bagh mahakte dekh raha hun ghaton par shamshanon par

patthar dil hain log yahan ke ye patthar kya pighlenge

kis ne barish hote dekhi tapte registanon par

jin ki ek nazar ke badle ham ne duniya thukra di

nam hamara sun kar rakhen hath wo apne kanon par

ahen ansu pesh kiye to ghabra ke munh pher liya

un ko shayad ghussa aya mere in nazranon par

kya taqdir ka shikwa yaro apni apni qismat hai

apna hath gaya hai aksar tute se paimanon par

aj kanwal ham kuchh bhi kah len bat magar ye sachchi hai

aj ka ik ik pal bhari hai pichhle kai zabanon par