انسان نہیں وہ جو گنہ گار نہیں ہیں

انسان نہیں وہ جو گنہ گار نہیں ہیں

وہ کون سا گلشن ہے جہاں خار نہیں ہیں

جو لوگ محبت میں گرفتار نہیں ہیں

وہ لوگ حقیقت کے پرستار نہیں ہیں

دنیا میں میسر ہے ابھی جنس محبت

صد حیف کہ پہلے سے خریدار نہیں ہیں

ٹوٹے ہیں نہ ٹوٹیں گے کبھی بوجھ سے غم کے

نازک ہیں مگر ریت کی دیوار نہیں ہیں

دل شوق سے دیں آپ مگر سوچ سمجھ کر

دنیا میں سبھی لوگ وفادار نہیں ہیں

جب عزم سفر کر ہی لیا آؤ چلیں ہم

طوفان کے تھمنے کے تو آثار نہیں ہیں

چڑھتا ہے کنولؔ کون صلیبوں پہ خوشی سے

سب لوگ مسیحا کے تو اوتار نہیں ہیں

insan nahin wo jo gunah gar nahin hain

wo kaun sa gulshan hai jahan khar nahin hain

jo log mohabbat mein giraftar nahin hain

wo log haqiqat ke parastar nahin hain

duniya mein muyassar hai abhi jins-e-mohabbat

sad haif ke pahle se kharidar nahin hain

tute hain na tutenge kabhi bojh se gham ke

nazuk hain magar ret ki diwar nahin hain

dil shauq se den ap magar soch samajh kar

duniya mein sabhi log wafadar nahin hain

jab azm-e-safar kar hi liya ao chalen ham

tufan ke thamne ke to asar nahin hain

charhta hai kanwal kaun salibon pe khushi se

sab log masiha ke to autar nahin hain