وفا جس کی ہستی میں شامل نہیں ہے

وفا جس کی ہستی میں شامل نہیں ہے

وہ دل ہی محبت کے قابل نہیں ہے

جو منزل پہ لے جائے طوفاں کہاں کا

جو کشتی ڈبو دے وہ ساحل نہیں ہے

ارادوں پہ قائم ہے ہستی ہماری

اگر جینا چاہو تو مشکل نہیں ہے

چراغوں کے بدلے یہاں دل جلاؤ

یہ دنیا ستاروں کی محفل نہیں ہے

جدھر سے وہ گزرے یہی شور اٹھا

مرا دل نہیں ہے مرا دل نہیں ہے

زمانے کی گردش میں الجھا ہوا ہوں

مرا دل مگر تجھ سے غافل نہیں ہے

کنولؔ جس کو سمجھا ہے تو اپنی منزل

وہ منزل کا دھوکا ہے منزل نہیں ہے

wafa jis ki hasti mein shamil nahin hai

wo dil hi mohabbat ke qabil nahin hai

jo manzil pe le jae tufan kahan ka

jo kashti dubo de wo sahil nahin hai

iradon pe qaim hai hasti hamari

agar jina chaho to mushkil nahin hai

charaghon ke badle yahan dil jalao

ye duniya sitaron ki mahfil nahin hai

jidhar se wo guzre yahi shor utha

mira dil nahin hai mira dil nahin hai

zamane ki gardish mein uljha hua hun

mira dil magar tujh se ghafil nahin hai

kanwal jis ko samjha hai to apni manzil

wo manzil ka dhoka hai manzil nahin hai