لوگ جن کو آج تک بار گراں سمجھا کئے

لوگ جن کو آج تک بار گراں سمجھا کئے

ہم انہیں لمحوں کو عمر جاوداں سمجھا کئے

موت کو ہم زندگی کی ترجماں سمجھا کئے

قطرۂ دریا کو بحر بیکراں سمجھا کئے

گو حقیقت ہی حقیقت تھی سراپا ہم مگر

زندگی کو داستاں ہی داستاں سمجھا کئے

حسرت سیر گلستاں خواب بن کر رہ گئی

وہ قفس نکلا جسے ہم آشیاں سمجھا کئے

ہاں وہی اک شخص نکلا بے مروت بے وفا

ہم جسے جان تمنا جان جاں سمجھا کئے

ہو گئے اک بار پھر ہم خود فریبی کے شکار

وہ زمیں نکلی جسے ہم آسماں سمجھا کئے

ہائے وہ نکلیں منظم رہزنوں کی ٹولیاں

آج تک جن کو کنولؔ ہم کارواں سمجھا کئے

log jin ko aj tak bar-e-giran samjha kiye

ham unhen lamhon ko umr-e-jawedan samjha kiye

maut ko ham zindagi ki tarjuman samjha kiye

qatra-e-dariya ko bahr-e-bekaran samjha kiye

go haqiqat hi haqiqat thi sarapa ham magar

zindagi ko dastan hi dastan samjha kiye

hasrat-e-sair-e-gulistan khwab ban kar rah gai

wo qafas nikla jise ham ashiyan samjha kiye

han wahi ik shakhs nikla be murawwat be wafa

ham jise jan-e-tamanna jan-e-jan samjha kiye

ho gae ik bar phir ham khud farebi ke shikar

wo zamin nikli jise ham asman samjha kiye

hae wo niklen munazzam rahzanon ki toliyan

aj tak jin ko kanwal ham karwan samjha kiye