کاندھوں پہ زندگی کی صلیبیں لئے ہوئے

کاندھوں پہ زندگی کی صلیبیں لئے ہوئے

غم پھر رہے ہیں میرا پتہ پوچھتے ہوئے

رہبر بھی راہزن بھی ہیں لوگوں کی بھیڑ میں

آؤ چلیں ادھر سے ادھر دیکھتے ہوئے

ہو آئے جب غرور کبھی خود پہ آپ کو

سورج کو دیکھ لینا کہیں ڈوبتے ہوئے

پہلی سی انجمن میں رہی بات اب کہاں

جی ڈر رہا ہے اب تو یہاں بولتے ہوئے

افسوس کاٹ دی ہے یوںہی زندگی تمام

دنیا سے جا رہے ہیں یہی سوچتے ہوئے

آخر یہیں ملے گا تمہیں دل کے آس پاس

صدیوں سے پھر رہے ہو جسے ڈھونڈتے ہوئے

لو وہ بھی کہہ رہے ہیں کنولؔ بے وفا مجھے

گزری ہے ایک عمر جنہیں پوجتے ہوئے

kandhon pe zindagi ki saliben liye hue

gham phir rahe hain mera pata puchhte hue

rahbar bhi rahzan bhi hain logon ki bhir mein

ao chalen idhar se idhar dekhte hue

ho ae jab ghurur kabhi khud pe ap ko

suraj ko dekh lena kahin dubte hue

pahli si anjuman mein rahi bat ab kahan

ji dar raha hai ab to yahan bolte hue

afsos kat di hai yunhi zindagi tamam

duniya se ja rahe hain yahi sochte hue

akhir yahin milega tumhen dil ke as pas

sadiyon se phir rahe ho jise dhundte hue

lo wo bhi kah rahe hain kanwal be wafa mujhe

guzri hai ek umr jinhen pujte hue