نفس نفس میں نہاں اضطراب ہوتا ہے

نفس نفس میں نہاں اضطراب ہوتا ہے

بلا کی چیز یہ دور شباب ہوتا ہے

ہے دفن اس میں ہر اک زندگی کا افسانہ

ہر ایک چہرہ مکمل کتاب ہوتا ہے

کسی کی یاد میں گزرا ہوا ہر اک لمحہ

بہت حسین بہت لاجواب ہوتا ہے

کسی کا نام بدلنے سے کچھ نہیں ہوتا

گل گلاب ہمیشہ گلاب ہوتا ہے

وفا میں جان بھی جائے تو غم نہ کر اے دل

وفا کی راہ میں مٹنا ثواب ہوتا ہے

مرے سلام محبت پہ آپ چپ کیوں ہیں

ہر اک سوال کا کچھ تو جواب ہوتا ہے

جنہیں نصیب ہوئی ہے کنولؔ شب ہجراں

انہیں خبر ہے کہ کیا اضطراب ہوتا ہے

nafas nafas mein nihan iztirab hota hai

bala ki chiz ye daur-e-shabab hota hai

hai dafn is mein har ik zindagi ka afsana

har ek chehra mukammal kitab hota hai

kisi ki yad mein guzra hua har ik lamha

bahut hasin bahut lajawab hota hai

kisi ka nam badalne se kuchh nahin hota

gul-e-gulab hamesha gulab hota hai

wafa mein jan bhi jae to gham na kar ai dil

wafa ki rah mein mitna sawab hota hai

mire salam mohabbat pe ap chup kyun hain

har ik sawal ka kuchh to jawab hota hai

jinhen nasib hui hai kanwal shab-e-hijran

unhen khabar hai ke kya iztirab hota hai