چھوڑ کر جنت جدھر بھی حضرت آدم گئے

چھوڑ کر جنت جدھر بھی حضرت آدم گئے

ساتھ ساتھ ان کے ہزاروں کاروان غم گئے

رفتہ رفتہ جب مری آنکھوں پر آنسو جم گئے

یوں لگا جیسے مسافر منزلوں پر تھم گئے

بے ثباتی پر تو جن کے رات بھر گریاں رہی

پھول کب کے وہ چمن سے دیکھ اے شبنم گئے

میکدہ ویران ساغر سرنگوں ساقی اداس

زندگی سے اب سرور و کیف کے عالم گئے

اگلے وقتوں کی کہاں اب رہ گئیں باتیں حضور

حسن کی سادہ مزاجی عشق کے دم خم گئے

انجمن کی انجمن تصویر بن کر رہ گئی

اس ادا سے آج ان کی انجمن میں ہم گئے

رہ گئی اب چلچلاتی دھوپ نفرت کی کنولؔ

چاندنی راتیں گئیں وہ پیار کے موسم گئے

chhor kar jannat jidhar bhi hazrat-e-adam gae

sath sath un ke hazaron karwan-e-gham gae

rafta rafta jab miri ankhon par ansu jam gae

yun laga jaise musafir manzilon par tham gae

be sabati par to jin ke rat bhar giryan rahi

phul kab ke wo chaman se dekh ai shabnam gae

maikada wiran saghar sarnigun saqi udas

zindagi se ab surur-o-kaif ke alam gae

agle waqton ki kahan ab rah gain baten huzur

husn ki sada mizaji ishq ke dam kham gae

anjuman ki anjuman taswir ban kar rah gai

is ada se aj un ki anjuman mein ham gae

rah gai ab chilchilati dhup nafrat ki kanwal

chandni raten gain wo pyar ke mausam gae