کوئی پورا جو مدعا نہ ہوا

کوئی پورا جو مدعا نہ ہوا

زندگی کے لئے برا نہ ہوا

اے غم دل وہ آ کے لوٹ گئے

ختم تیرا بھی اب فسانہ ہوا

کیجئے کیا کہ گریۂ پیہم

دل مضطر کا آسرا نہ ہوا

وہ بتائے گا قرب و دوری کو

پاس رہ کر جو آپ کا نہ ہوا

جان آنکھوں میں آ گئی لیکن

چارہ گر درد آشنا نہ ہوا

کیا بگاڑے گا اے کلیمؔ آخر

گر مخالف ترا زمانہ ہوا

koi pura jo muddaa na hua

zindagi ke liye bura na hua

ai gham-e-dil wo a ke laut gae

khatm tera bhi ab fasana hua

kijiye kya ke girya-e-paiham

dil-e-muztar ka asra na hua

wo bataega qurb-o-duri ko

pas rah kar jo ap ka na hua

jan ankhon mein a gai lekin

chara gar dard-e-ashna na hua

kya bigarega ai kalim akhir

gar mukhalif tira zamana hua