تم نے جب زلف پریشاں کو سنوارا ہوگا

تم نے جب زلف پریشاں کو سنوارا ہوگا

صدقۂ حسن گھٹاؤں نے اتارا ہوگا

آپ کی چشم کرم کا جو اشارہ ہوگا

اوج پر میرے مقدر کا ستارہ ہوگا

سنگ دل تیرے بھی آنسو نکل آئے ہوں گے

ڈوبنے والے نے جب تجھ کو پکارا ہوگا

میں نے الزام خوشی سے لیے سب اپنے سر

آپ بدنام ہوں یہ کس کو گوارہ ہوگا

کچھ تو قسمت کی ہے سازش مری بربادی میں

اور کچھ ان کی بھی نظروں کا اشارہ ہوگا

کیا غرض اس کو زمانے کی خوشی سے دانشؔ

یار کا غم ہی جسے جان سے پیارا ہوگا

tum ne jab zulf-e-pareshan ko sanwara hoga

sadqa-e-husn ghataon ne utara hoga

ap ki chashm-e-karam ka jo ishara hoga

auj par mere muqaddar ka sitara hoga

sang dil tere bhi ansu nikal ae honge

dubne wale ne jab tujh ko pukara hoga

main ne ilzam khushi se liye sab apne sar

ap badnam hun ye kis ko gawara hoga

kuchh to qismat ki hai sazish miri barbadi mein

aur kuchh un ki bhi nazron ka ishara hoga

kya gharaz us ko zamane ki khushi se danish

yar ka gham hi jise jan se pyara hoga